आजु गई हौ नंद भवन मैं -सूरदास

सूरसागर

दशम स्कन्ध

राग आसावरी आजु गई हौं नंद भवन मैं, कहा कहौं गृह चैन री। चहूँ ओर चतुरंग लच्छमो, कोटिक दुहियत घैत री। घूमि रहीं जित तित दधि मयनी, सुरत मेघ-धुनि लाजै री। बरनौं कहा सदन की सोभा, बैकुंठहु तैं राजै री। बोलि लई नव बधू जानि जहँ खेलत कुँवर कन्हाई री। मुख देखत मोहिनी सी लागी, रूप न बरन्यौ जाई री। लटकन लटकि रहे भ्रू ऊपर, रँग रँग मनि-गन पोहे री। मानहुं गुरु-सनि-सुक्र एक ह्वै, लाल भाल पर सोहे री। गोरोचन कौ तिलक, निकटहीं काजर-बिंदुका लाग्यौ री। मनौ कमल कौ पो पराग, अलि-सावक सोइ न जाग्यौ री। बिधु-आनन पर दीरब लोचन, नासा लटकत माती री। मानौ सोम संग करि लीने, जानि आपने गोती री। सीपज-माल स्याम-उर सोहै, बिच बध-नहँ छबि पावै री। मानौ द्वैज ससि नखत सहित है उपमा कहत न आवै री। सोभा-सिंधु अंग अंगनि प्रति, बरनत नाहिंन ओर री। जित देखौं मन भयौ तितहिं कौ, मनौ भरे कौ चोर री। बरनों कहा अंग-अंग-सोभा, भरी भाव जल-रास री। लाल गोपाल बाल-छबि बरनत, कबि-कुल करिहै हास री। जो मेरी अँखियनि रसना होती कहती रूप बनाइ री। चिरजीवहु जसुदा कौ ढोटा, सूरदास बलि जाइ री।।139।।