सखी री माधोहिं दोष न दीजै -सूरदास

सूरसागर

दशम स्कन्ध

राग बिलावल सखी री माधोहिं दोष न दीजै। जो कछु करि सकियै सोई सब, या मुरली कौं कीजै।। बार-बार बन बोलि मधुर धुनि, अति प्रतीत उपजाई। मिलि स्रवननि मन मोहि महा रस, तन की सुधि बिसराई।। मुख मृदु बचन, कपट उर अंतर, हम यह बात न जानी। लोक-भेद-कुल छाँड़ि आपनौ, जोइ-जोइ कही सु मानी।। अजहूँ वहै प्रकृति याकैं जिय लुब्धक-संग ज्यौं साधी। सूरदास क्यौं हूँ करुना मैं, परति नहीं अवराधी।।1312।।