ब्रज की सुरत मोहिं बहु आवै -हनुमान प्रसाद पोद्दार

पद रत्नाकर -हनुमान प्रसाद पोद्दार

श्रीराधा माधव लीला माधुरी

राग आसावरी - तीन ताल ब्रज की सुरत मोहिं बहु आवै। जसुमति-मैया कर-कमलन की माखन-रोटी भावै॥ बूढ़े बाबा नंद मोहि लै ललराते निज गोद। हौं चढ़ि तौंद नाचतौ, तब वे भरि जाते अति मोद॥ बालपने के सखा ग्वाल-बालक सब भोरे-भारे। सब तजि जिन मोहि कहँ सुख दीन्हौं, कैसें जायँ बिसारे॥ व्रज-जुबतिन की प्रीति-रीति की कहौं कहा मैं बात। लोक-बेद की तज मरजादा, मो हित नित ललचात॥ मेरे नयननि की पुतरी वे जीवन की आधार। सुधि आवत ही प्रिय गोपिन की, बही नयन जल-धार॥ आराधिका, नित्य आराध्या राधा को लै नाम। चुप रहि ग‌ए, बोल नहिं पा‌ए, परे धरनि, हिय थाम॥