बंसी री बन कान्ह बजावत -सूरदास

सूरसागर

दशम स्कन्ध

राग सारंग बंसी री बन कान्ह बजावत। आनि सुनौ स्रवननि मधुरे सुर, राज मध्य लै नाम बुलावत। सुर स्रुति तान बँधान अमित अति, सप्त अतीत अनागत-आवत। जुरि जुग भुज सिर, सेष सैल, मथि बदन-पयोधि, अमृत उपजावत। मनौ मोहिनी बेष धारि कै, मन मोहत मधु पान करावत। सुर नर मुनि बस किए राग-रस, अधर-सुधा-रस मदन जगावत। महा मनोहर नाद, सूर, थिर, चर मोहे, कोउ मरम न पावत। मानहुँ मूक मिठाई के गुन, कहि न सकत मुख, सोस डुलावत।।648।।