फिरत प्रभु पूछत बन-द्रुम-वेली -सूरदास

सूरसागर

नवम स्कन्ध

राग केदारौ   फिरत प्रभु पूछत बन-द्रुम-वेली। अहो वंघु, काहूँ अवलोकी इहिं मग बधू अकेली। अहो बिहंग, अहो पन्नग-नृप, या कंदर के राइ। अवकैं मेरी विपति मिटावौ, जानकि देहु बताइ। चंपस-पुहुप-वरन-तन-सुंदर, मनौ चित-अवरेखी। हो रघुनाथ, निसाचर कैं सँग अबै जात हौं देखो। यह सुनि धावत धरनि, चरन की प्रतिमा पथ मैं पाई। नैन-नीर रघुनाथ सानि सो, सिव ज्यौं गात चढ़ाई। कहुँ हिय-हार, कहूँ कर-कंकन, कहुँ नूपुर कहुँ चीर। सूरदास बन-बन अवलोकत, बिलख बदन रघुबीर॥64॥